Zaira Bermúdez e Miguel Riopedre, ambos do Club de Loitas Olímpicas de Vilalba, participaron no campionato do Mundo de Sambo do 10 ó 14 de Novembro que tivo lugar en Sofía (Bulgaria), con pouca sorte.

Os dous deportistas que se forman na Universidade de Coruña, e adestran co grupo de rendemento dirixido por Eduardo Carballeira, participaron no campionato do Mundo de Loita Sambo con pouca sorte.

Zaira Bermúdez, caeu en primeira rolda e quedou afastada da competición. Un primeiro cruce extremadamente complicado hipotecou as opcións da xoven deportista. Por outra banda, Miguel Riopedre, venceu no seu primeiro cruce na competición mundialista, pero cedeu en segunda rolda, o que lle privou da loita polas medallas.

Ambos deportistas quedaron afastados da repesca, o que a postre frustrou as súas opcións de achegarse a zona das medallas.

Cabe destacar, que esta é a primeira vez que ambos deportistas compiten a nivel mundial. Igual sorte correron o resto do equipo nacional, nunha xornda aciaga para os resultados deportivos.

Agora todos, centran a súa preparación de cara os campionatos de España, que terán lugar a principios do ano 2017.